SD6

Ti xa xogaches ao rol. Cando imaxinas que estás nos teus debuxos favoritos e interpretas a outras personaxes, iso é rol. Esta é apenas unha forma diferente que empregamos «a xente vella» para non sentirmos ridículos ^_^

Neste xogo de rol, unha persoa (a Dirección) propón unha situación coa axuda das regras. As demais, coa súa axuda, contan o que fan as personaxes protagonistas e se vai contando unha historia en grupo.

Protagonistas

Todas as persoas participantes, agás a Dirección, encarnan a unha das Protagonistas da historia (como Perry o Ornitorrinco, Spiderman ou a Princesa Chicle).

Escolle un Nome para a personaxe e escríbeo na ficha debaixo do teu. Escribe tamén unha Idea que a defina. Por exemplo, Perry é unha Mascota Espía. As personaxes Protagonistas teñen seis Habilidades con dous puntos en cada unha. Distribúe outros seis puntos entre elas sen superar os cinco en ningunha.

Rolas FORza cando queres mover algo pesado ou golpear cunha arma grande (coma un machado). Tamén para saltares moi lonxe, subires un muro, romperes unha porta…
Rolas DEStreza cando fas equilibrios nunha corda, ou cando intentas esquivar un golpe. Tamén para te liberares dunhas ataduras ou para golpeares cunha arma lixeira (como a espada dos mosqueteiros).
Rolas RESistencia para recuperarte das túas feridas, correr durante moito tempo, resistir un veleno…
Rolas INTelixencia para resolver un enigma, lembrar algo, ou curar a alguén. Tamén para faceres maxia «de bruxería» (bólas de lume, pocións máxicas, e cousas así).
Rolas PERcepción para decatarte de algo. Tamén podes rolar para descubrires que che están a mentir ou resistires a maxia que engane os teus sentidos.
Rolas CARisma para convencer á xente ou incluso mentirlles. Tamén podes rolar para non teres medo ou faceres maxia «de fadas» (encantamentos, ilusións e cousas así).

Rola os dados

Para xogar só tes que contar o que fai a túa personaxe Protagonista, como por exemplo, pelexar cos robots de Doofenshmirtz ou crear un novo feitizo. Despois, a Dirección vaiche dicir como se defenden os robots ou vaiche descubrir que non tes suficiente pó de fadas. Rola os dados se o que intentas facer é perigoso ou emocionante, ou se a Dirección e ti non vos poñedes de acordo. Ti non queres que os robots te derroten! Rola tantos dados coma teñas na Habilidade que esteas a empregar. Cada 5 ou 6 que saques é un éxito.

A Dirección rolará ata cinco dados se as cousas son difíciles para a túa personaxe Protagonista. Se es máis pequeno que os robots podería rolar apenas un, por exemplo.

Se as cousas foren máis doadas, ademais de que a Dirección non role dados, é posible que ti roles algúns máis. Se a túa Idea —como ser unha Mascota Espía— ou as túas amizades axudaren, poderías rolar un ou dous dados adicionais.

Se tiveres un ou máis éxitos e a Dirección ningún, entón o conseguirás sen dificultade: derrotarás os robots ou crearás o feitizo.
Se tiveres máis éxito que a Dirección, tamén o conseguirás pero con algunha dificultade: terás cansazo, ou quizáis feridas.
Se tiveres os mesmos ou menos éxitos cá Dirección, entón non o lograrás, pero non é definitivo. Os robots apresarante ou o laboratorio encherase de pó rosa.
Se non tiveres éxitos e a Dirección si, non o darás feito. Os robots botarante a outra dimensión ou o feitizo destruirá os teus valiosos libros.

Licenza

SD6 é un xogo de Silvia Vic Gar licenciado Creative Commons Atribución-Non comercial-Compartir igual. Tradución ao galego pola comunidade das Irmandades do Dado.